في البدايه وقبل ان يبداء ((الشاطح)) عواد بقصته احب ان امسي او اصبح على الجميع بالخير وعلى راسهم ابو نواف قائد هذي السفينه المجهزه بجميع الخدمات من ترفيه وثقافه ومعلومات وشراب<< بيجيب العيد هههههههههههواحب ان اوجه شكر خاص لكل من رد على قصتي السابقه واتمنى ان تكون هذي القصه عند مستوى الطموح..
قبل البدايه هذي قصه خياليه لاتمت لي بصله وعواد هذا لا اعرفه ولا يعرفني ولا ابي اعرفه << شكله العيب فيك موو بعواد ههههههه
اخليكم مع قصة عواد وانتظر ردت الفعل منكم<< يدور مضاربه ابو الشباب خخخخخخخ

غلطة العمر

ابطال القصه:

ابو عواد


وام عواد:: حصه



وعواد الابن الوحيد بالعائله



ابو حمدان اخو حصه



قبل البدايه بالقصه احب اوضح لكم ان القصه الهدف الاول والاخير هو الضحك والوناسه وسعة الصدر لا اكثر ولا اقل وجميع ابطال هذي القصه من الخيالنبذه بسيطه عن عائلة ابو عواد
تعتبر عائلة ابو عواد عائله متوسطة الدخل ولكن تمتاز بأن يوجد لديهم عيب خلقي بالفقره السابعه من المخ وتم تشخيص هذا المرض من الدكتور غير البشر وقالهم بالحرف الواحد (( انا مافهم شي بالطب اذا حصلتوا حل لمشكلتكم )) فالمشكله هي ليست وراثيه ... فلذلك وبسبب هذا المرض تفتقد العائله للتفكير فهي تمشي بالايام على هواها وبالعاميه (( طقها والحقها )) وهناك قصص كثيره حدثت مع هذي العائله الغريبه بتكوينها ولكن ابرزها سوف اقوم بسردها لكم وان شاء الله تنال على اعجابكم ...

في منزل ابو حمدان
عواد : يبااا يبااا يرحم والديك تكفى خلنا ننام عند بيت خالي طفشنا من بيتناا ومقابلة وجهك << يسمع بالاقناع عواد

ابو عواد : لاتكفى باموت عاد لو مانمت عندي هوواا هواا ياناااس ماقدر اعيش بدون عواد انقلع انت وراسك اللي كنه هارد دسك .. .. ام عواااااااااااااااااااااااااااااااااااااااااااااااا ااااااد << جالس ينادي

ابو حمدان : هيييييييه هيييييييه خيرر يابو الشباب جالس بملعب الملز انت وراسك ؟؟ تراك ببيت محترم احترم نفسك ولا قسم بالله ماخلي اختي تروح معك ..

ابو عواد : اقووول تراكم ماخذين مقلب انت وولدك بحصه والله لو انها حصه وهبي على غفله ... بعدين هذي زوجتي وانت يابو شنب نص كم مالك دخل اناديها اضربها احنطها عندي بالبيت زوجتي وانا حر فيهاا .. ماعطيتكم المهر حقها؟؟ خلااااااص ولا كلمه تبونها رجعوا فلوسي<< لعن ابو بليسك مشتري كوره موو متزوج

عاد هنا ابو حمدان قمط العافيه قال الحين لو تهاوشت معه بيخلي حصه عندنا ونبلش فيه

ابو حمدان : يارجال طلعت ماعندك سالفه انت وشنبك اللي كوم ونص .. ياخي امزح معك ماتعرف المزح انت؟؟

ام عواد : وش فيها اصواتكم واصله لاخر الشارع ... انا قلت بس احصل الحين ابو حمدان ذابح ابو عواد ..<< تبي الفكه منه

ابو عواد : وانتي وش موديك اخر الشارع؟؟<< مسوي عنده دقة ملاحظه خخخخخخخخخخخخ

عواد : يباا انت مشكلتك عقلك نضيف بس ماتعرف متى تستخدمه يعني من يوم طلعت من على هالدنيا عمري ماشفتك تدقق الا بالموقف الغبي هذا وياليتك ماشغلت مخك بعد

شوي ماتشوفون الا كوب شاهي يمشي مليون ومايوقف غير بجبهة ابو حمدان .... وطاح واغمى عليه ..<< مادري وش دخله المسكين ذا خخخخخخخخخخخخخ

ام عواد : والله وصاير قوي يابو عواد لاتنسى تراك ببيت اخواني قسم بالله اناديهم لك لاخليهم يعلقون كل عضو من اعضاء جسمك بمروحه ومانزلهم غير لما تنشف ويطلع الشر اللي براسك << ترى مادري وش الهدف من انه تنشف الاعضاء كركركركر

ابو عواد : المهم لايكثر تبون تجون معي ولا تنامون عند اخوانك؟

عواااد :: يممممممممه ااااااااااع وووووووااااااااااع ابي انام عند خوالي ...<< ترا جالس يصيح الحين
هو ماكمل الصياااح ال تشوف رجل ماشيه مليون على فمه ...

ام عواد : كل تبن الحين ماعندنا بيت ننام فيه بعدين اللي يسمعك بيت خالك الحكير على غفله اشوا ان عيال خالك من اليوم يصفقون فيك من جدار لجدار انت وراسك اللي كنه علامة قف مقلوبه يالرخمه شكلك ماترتاح الا اذا تصفقت

عواد : انا اتصفق عادي احسن من اللي تجي عند بيت خالي عشان تكنس لهم وتطبخ يالمخفه ياللي مهجدتك سوسن زوجة خالي

ابو عواد : صبر صبر صبر<< مصدوم الرجال

الحين كل يوم مزعجينااا ويالله مشيناا نبي نغير جوو اخرتها تطلعون واحد يطبخ ويكنس والثاني يتصفق؟؟<< طاحووا من عينه
ام عواد : اقول انت لاتسوي فيها عاد علينااا؟؟ لاتكون نسيت ابو صقر اللي بالحاره اللي اذا كان واقف على زاوية الحاره مانقدر نطلع من البيت ..<< عيله رايحه فيها خخخخخخخ


ابو عواد : الله يرجك بس ترى عادي الكنس والطبخ اعتبريها عمل خيري .. المهم خليناا نمشي الحين بس تأخرنا على البيت

طلع ابو عوادوام عواد وولدهم عواد ... وجالسين يتمشوون بالسياره وقفوا عند محل عصيرات نزل ابو عواد وعواد وجلست ام عواد بالسياره ....

وهي جالسه بالسياره تتسمع على محمد عبدو(( المعازيم )) الا تشوف مطاردة شرطه لواحد وتعدل جلستها ام عواد وتفتح الشباك لاتسالوني وش الهدف لاني انا نفسي حاولت احلل الموقف ماعرفت المهم وكل شوي يقترب هالشخص من سيارة ام عواد ولما قرب منها اكثر رمى عليها كيس ابيض واختفى واستمرت الشرطه تطارده ...

مسكة ام عواد الكيس وجلست تقلب فيها يمين يسار ولا مافيه شي مكتوب .. وتفتحه وتذوقه الا والله طعمه شي قالت بقلبها (( الحين باكذب على ابو عواد وولده واقولهم اني طابخته )) << وين المدمنين عنك ياشيخ تطبخي حشيش كرككركركر
جاء عواد وابوه وركبوا السياره .. الا ام عواد جالسه تشم شي ابيض

عواد : انا شايف الحركه ذي وين يسونها بس مادري وين وين ياربي
ابو عواد : والله حتى انا شايفها هالحركه حتى مايخلص شم يرفع راسه فوق ويبتسم ويقول ااااااااه بس ويييييييين شفتها مادري

تمسك ام عواد الكيس وتعطيه زوجها قالت شم ريحة الطحين اللي انا مسويته بنفسي شم يابعد عمري شم << دخلة جو مع الحشيش

ابو عواد : انتي الكبسه اذا سوتيها تذلينا فيها شهر معقوله عاد تطبخي لنا طحين...؟؟
عواد : يبا هو الطحين ينطبخ؟؟

ام عواد : كل تبن انا قلت سويته ماقلت طبخته ..

ابو عواد : يعني وشلون سوتيه وش الفرق يعني انتي وراسك اللي كنه علبة شاني
ام عواد : اقول ابو عواد ااااااه بس لو ماني احبك كان زحفت عليك وعلمت ان الله حق وان كل شي بالدنيا ذي منتهي وان ماجد الاسطوره واني انا اقوى وحده واحلى تحيه للشعب السعودي وابو عواد والصحبه الحلوه ورقصني ياقدع<< بدى مفعول الحشيش كركرككركر

طالع فيها ابو عواد بنص عين وتحمد الله على النعمه اللي هو فيها ومسك كيس الطحين وجلس يشم وعجبه وجلس يشم الين سحبه عواد منه بالقوه ... ويجلس يشم عواد الين طلع من اذانه ..

شغل ابو عواد السياره ومشى وهم ماشين بالطريق لاحظ ام عواد ماسكه صينيه كانت جايبته معها وتلف يمين ويسار فيهاا ..
ابو عواد : وش عندك وش هالحركه اللي انت تسويهاا يام عواد :

ام عواد : انت تسوق بالجهه اليسار وانا باسوق بالجهه اليمين ... عشان لو جت سياره فجأه من اليمين كيف تبي تلف عنها؟ لازم اكون انا صاحيه معك ولا شلون يقولون الزوجه هي النصف الاخر للزوج <<انلحست ام عواد
ابو عواد : صح صح كيف راحت هذي عن بالي.... شوي الا ابو عواد بقفا يده يصك عواد ... وانت ليه ماتسوق معنا ؟؟؟ لو جت سيارة الحين من ورى وش نبي نسوي؟؟ هااه ماتشوفونا انا وامك كل واحد ماسك جهه .. << جالسين بملعب موو بسياره خخخخخخخ

الا يقوم عواد ومسك المرتبه ويجلس يسوق معهم
ام عواد : اووع اووووع وقف وقف يابو عواد الاشاره خضراء...
ابو عواد : تصدقي من بعيد كنت اشوفها حمراء اشوا انك جنبي وتسوقي معي ولا كان مشيت
عواد : بيب يييييب
ام عواد : ياورع لاتبلشنا وش فيك تدق بوري؟؟
عواد : على شحم اقول انا ادق بوري لهتلر زمانه
ابو عواد : وش تبي تراك ابلشتني ماتشوف الخط زحمه؟؟
عواد : ياخي افتح خط لي ترى طفشت وانا من اليوم ماشي وراك باوصل بدري
ابو عواد : اصصصصصص خلك وراي انت ماتدل البيت
ام عواد تأشر بيدهاا لابو عواد
ابو عواد : هلا هلا بالغلا كله امري وش بغيتي؟؟
ام عواد : تصدق انا احس اني بانشرت الجهه حقتي
ابو عواد : تصدقي حتى انا بنشرت بعد
ينزلون كلهم من السياره شوي الا عواد نازل
ابو عواد : لالا لاتقول بنشرت بعد؟؟
عواد : لالا انا مابنشرت بس نازل اتطمن عليكم

جلسوا كلهم على الارض والكل يطالع ببعض وكل واحد كانه مايعرف الثاني
ابو عواد : تصدقوا عااد ياشباب اني احس اني بعيييييد عن الأرض احس اني على قارب بالبحر

ام عواد وعواد : تصدق عاد اننا معك على نفس القارب كرككركركر

ابو عواد : عواد ياولدي بما اننا على قارب واحد تخيل انه طلع لك المارد وش تبي تطلب منه؟؟
ام عواد : شووووووووبيك لبيكك ام عواد بين ايديك اطلب واتمنى ياعواد وكل شي راح يتحقق

عواد : امممم ابي ابي النصر يكون بطل الدوري وبطل ولي العهد السنه الجايه

ام عواد : اطلب أي طلب ثاني وراح يتحقق بس هذا صعب طلبوه كثيررررر قبلك

عواد : طيب خلاص دام النصر ماتقدر تخليه يجيب بطوله ابي الحكام والحظ مايصيرون مع الهلال عشان يصير فيه تنافس
ام عواد : اقولك ياورع انت تبي النصر يفوز بالدوري وولي العهد بس ولا بكأس الملك بعد؟؟
ابو عواد : ههههههههههههه الله يرجكم قسم بالله اللي يشوفكم يقول ذولا محششين<<لا ياشيخ << عصب المؤلف خخخخخخ

ام عواد : طيب يابو عواد تخيل انه معك 50 مليار ريال وش بتسوي فيهم؟
ابو عواد : اول شي اطلقك وبعد ماطلقك ارسل واحد يذبحك عشان ماتذكر الماضي اللي معك وبعدها باشتري لي عماره خمس شقق وتحت فيها بقاله وحلاق ومكتب عقار ولا عاد ابي شي من الدني

ام عواد : ياحقير اقولك 50 مليار تقولي عماره خمس شقق والله وجه الفقر عمره مايعرف للفلوس انقلع بس مالت عليك انت وخشمك اللي كنه مواقف سياراتعواد : اقوول بما اننا تجمعنا هالجمعه الحلوه والاحلى مافيها انها صدفه وبدون أي ترتيبات ومواعيد عندي سوال محيرني من سنين وسنين باختصار من يوم ماعرفتكم ... سوالي

كيف يايبا انت وامي تعرفتوا على بعض وتزوجتوا؟؟ الصراحه مافيه أي تناسق بينكم بعدين يايبا انت شين يعني يرحم امك خذ لك وحده حلوه عشان يطلعون عيالك نص حلوين ونص شيون موو تاخذ وحده مثلك بعد شينه يطلعون عيالك 100% شيون ياخي وش ذنبنا حنا يرحم امك مالها داعي هالحركات يعني انا وش ذنبي الحين اني شين؟؟ عشانك انت تزوجة امي طيب وبعدين؟؟
ام عواد : وشو البعدين؟
عواد : وبعدين؟؟
ابو عواد : ايوه طيب وشو البعدين ؟؟
عواد : مادري
ابو عواد : قوم اطلع برى قوووومخخخخخخ
ام عواد : لالا خله خله يابو عواد هذا صغير وباقي ماجرب الحياه ومرارتها لو جرب مر الحياه كان عرف ان ماجبرني على مرك الا اللي امر منه
ابو عواد : تكفين عاد الحين انا عايش احلى حياتي معك اشوى ان ابوك حلف علي اني ماتزوج غيرك
عواد: اصصص بسالكم سوال ثاني بس ابي جواب بصراحه
ام عواد : قول قول ياولد انا اصلا امووت بالصراحه
عواد : ابي اعرف شي واحد بس الحين اغلب الناس كل واحد عنده اخ واحد واخ اثنين واخ ثلاثه ليه انا بس انا واحد بالبيت << قلب هندي الولد
ابو عواد : لما تكبر ياولد رااح تعرف .. لما يجيك ولد مثلك راح تعاف
العيال ... بالله وش موقفك يوم تدخل حضانة الاطفال وتشوف الاطفال انواع البرائه وانت ولدك اول ماطلع من بطن امه شنب ..

ام عواد : تصدقون اني بعد ماشميت الطحين احس اني ماني متوازنه على الارض

عواد : يمه هالطحين كل يوم سويه لناا والله ياهو فله احس بس ودي انسدح على بطني واضحك تصدقي مادريت ان ابوي شنبه متوازي الاظلاع الا يوم شميت الطحينام عواد : ومين قالكم اني سويته؟؟ مصدقين انتم؟

ابو عواد : اجل مين مهديك ياه؟؟<< طقم ذهب موو طحين كركركركرام عواد : واحد

عواد : افااااااا افاااا يايمه الحين ابوي هذا طوله وعرضه ماملى عينك هو صح انه يجيب الهم ومادري كيف وافقتي عليه بس عاد انتي بعد احمدي ربك انه تزوجك وماخلاك تعنسي<< ضربت الفيوز عند عواد
ام عواد : اقول كل تبن ياورع .. والله زمن وصخ ورع طول اصبعك يتكلم عليك ... السالفه يابو عواد وتكفى لاتفهمني غلط والله مابيني وبينه شي انا بس كنت اطالع فيه وهو شكله اعجب فيني وحب يهديني هالطحين ذكرى

نزل ابو عواد راسه بالارض ونزلت منه دمعة قهر وقال بصوت عالي (( اكبر قهر لاشفت زوجتك تخونك مع اخس الناس عندك ))<< محشش << لاياشيخ ههههههههههههام عواد : لاااااااا لاتفهني غلط يابو عواد

ابو عواد : ماعاد فيها توضيح للأمور يام عواد خلااص عرفتك اصلا انا من زمان وانا شاك باخلاقك من يوم كنت اشوفك تلبسي لي قصير وانا ماني مرتاح لك << جاب العيد ابو عواد هههههههههه
ام عواد : السالفه يابو عواد ان الرجال الشرطه كانت تلحقه وانا عطيته نظره وقام رمى هالكيس علي
عواد : هااااه الشرطه تلحقه؟؟
ابو عواد : يعني هذا مو طحين؟؟
ام عواد : تبي الصدق انا كنت شاك بالموضوع من زماااااااان مافيه طحين يخلي الواحد يضحك
عواد : يعني هذا حشيشششش؟؟؟ ام عواد وابو عواد : يعني حنا مدمنين؟؟


عواد : طيب واذا خلص هالكيس وش نبي نسوي؟؟ بعنا السياره وبعدين ؟؟؟ بعنا ذهب امي وهو كله على بعضه خاتم وبعدين طيب؟؟؟ تبوني اطر عند المسااجد عشان اجيب الحشيش لك انت وامي يامدمنين ابو عواد : اقول كل تبن اللي يسمعك الحين مانت مدمن معنا

ام عواد : اسمعوا خلاص دام اننا ادمنا وماعاد نقدر نترك هالشي وش رايكم ناخذ هالكيس اللي معنا ونحاول نزرعه بالحوش عندنا يمكن يطلع مثله ..<< نعناع موو حشيش

ابو عواد : اقول لعن ابو بليسك المهربين يسون اختراعات للتهريب وناس طارت ارقابها عشان هالحشيش وانتي بكل بساطه تبي تزرعيه بحوشكم اقول والله الشرهه موو عليك الشرهه على اللي يحشش ويدمن معكم

عواد : انا من يوم طلعت هالدنيا وعشت معكم وانا ماني مرتاح لكم كنت احس انه بيجي يوم وينتهي مستقبلي بسببكم


قام عواد ومسك سكين وطالع فيهااا وطالع بامه وابوه وقال بقلبه (( خلني اذبحهم انا احسن مايجي يوم احصلهم ميتين عندي بالبيت وابلش فيهم )) << مشكله محشش ويفكر كركركركركر

قام عواد وركض باتجاه امه وكان يحمل السكين وكانت ام عواد تطالعه وتقول بصوت عالي (( هلا هلا بوليدي عوعو تعال تعال بحضن امك )) ولم تعلم ام عواد ان اللي بيجي بحضنها سكين من يد عواد

ثواني قليله وانغرست السكين بقلب ام عواد واخرجهااا عواد وغرسها بقلب ابو عواد اللي كان نايم ولا هو داري عن شي

.
.
.

وهكذا انتهت قصة عواد وعائلته بسبب كيس مجهول ولكن اللي بداخله لم يكن مجهول<< لاياشيخ خخخخخخ<< مسوي بيدخلكم جو الحين ههههه

سلم نفسه عواد للشرطه وحكمت عليه المحكمه بالقصاص شنقا لمدى الحياه << حشش عملاق من كثر ماكتب حشيش كركركركر
النهايه


القصه خياليه100%ولكن حدثت قصص كثيره وسمعنا عن اب يذبح بنته والسبب انه كان سكران او اخ يغتصب اخته والسبب انه كان ماخذ جرعه زايده قصص كثيره يمكن ابرزها واخره حصلت بتبوك اب اغتصب بناته الخمسه حتى حصلت المصيبه اللي هي ان وحده من بناته حملت منه والعياذ بالله طبعا الحمد الله تم القبض عليه وحكموا عليه بالقصاص .. بعضها من قوة القصه نحسها خياليه ولكن لما نجي نفكر فيها بالعقل ... ان أي شخص مامعه عقل مانلومه على اللي يسويه وكل اللي يتعاطون المخدرات يكونوا وقتها بدون عقل يعني توقع منهم أي شي وباي وقت اتمنى اني وصلت للهدف اللي ابيه وان كانت القصه كلها صرقعه

نسأل الله ان يعافيهم مما ابتلاهم وان يحمينا ويحمي شبابنا من هذي الآفه القاتله اللي دمرت شبابنا دمار مخيف .

لا لا للمخــدرات << ياقديم خخخخخ

اخوكم : عملاق الصرقعه

:::::::::::::::::::::::::::