مرحبا بكم اعضاء مجموعة ومجالس ابونواف العربيه كما عودناكم
في كل مره ، نبحث عن الاثاره وننفرد بالخبر قبل غيرنا وهذا ليس من فراغ
فشعارنا المعروف " لك يكون الابداع فكن برفقتنا " هو اساس علمنا ومصادقيتنا
ومن هذا المنطلق وسعينا الى القمه والكمال " باذن الله " ومن خلال مشاهداتنا اليوميه
صادفنا في الطريق
سيارة عجيب يقودها شاب اكتشفنا فيما بعد انه سعودي وقد كتب رقمه على " رفرف " السيارة
اتصلنا عليه
استوقفناه على جانب الطريق وتجاذبنا اطراف الحديث معه وصحبنا معه الى " الحوش " الذي
يتواجد فيه
وذلك لاجراء مقابله مصغره وتصوير هذه السيارة ولكن حديثنا معه كان ذو شجون والان اترككم
مع ابومازن
1
في البدايه اخوي ابومازن ياليت تحدثنا عن فكره السيارة ؟
اول شي اخوي " قهر " خلني اعلمك انا طبيعتي احب البر وبعد احب الشغل واحب احبرش
كان الوالد عنده ماطور هواء صغير للبيت وقمت اخذه من الوالد اذا طلعت للبر واحطه في
سيارتي الخاصه
واطلع للعاذريه وافتح الشنطه واعبي هواء للناس وعلى اقبال لكن على خفيف قمت بعدها اخذت
هايلوكس
حقت واحد من الشباب قلت بشوف الشغله تنفع والا لا واخذتها وحطيت ماطور هواء وركبت ماطور
كهرباء
صغير ، وقمت اشتغل ولكن في عز الشغل الوالد الله يحفظه تعب ورقد المستشفى وتركت الشغله
علشان الوالد
واكون بجواره ولكن خلال الفتره الثلاث شهور اللي كنت مع الوالد كنت ادور سياره غماره
احط فيها العده كلها
ولقيت هالونيت واخذته وزينته زي ماتشوف والحين مشت اموري ولله الحمد .
2
الفكره من هالسياره ؟
الفكره من السياره هو تقديم اسعافات اوليه سريعه للمتعطلين في البر من بنشر هواء او
رقعه كفر
وكذلك عندنا زيت مكينه وزيون دبابات وغيرها من الاشياء المتوفره ..
صور لداخل السيارة ومافيها من تجهيزات
3
ممكن تشرح لنا كيف تم تجهيز هذه السياره ؟
اول شي هالسياره لقيتها في الصناعيه وشريتها من واحد سوري بحوالي 1500 ريال سعودي بعدها
قمت
اصلح عليها واغير قطع من كلبيليتر و .... وغيرها من القطع الين ماهداها الله وضبطت
معي ن وحطيت لها
انوار وبواري مشكله وزي ماتشوف السرج ..
والله يعني فيه وفيه ، فيه ناس تتعجب وتبدي اعجابها وخاصه اذا عرف اني سعودي واكسب
رزقي بالحلال
وبعضهم لا يجي ويضحك ويستهبل ، وفيه بعضهم ياخذ مثلا من الهواء ويعبي كفراته ويمشي
ولا يحاسب
وناس تزعل لو قلت له هذا قيمته بكذا او اجاره بكذا ، والله لو انا اجنبي يمكن يخاف
مني ومايقدر يقول شي
طيب هذا وانا ابن البلد ومعروف يعني ما اقدر اغشك او اللعب عليك لاني موجود في هالديره
وين اروح ؟
بينما الاجنبي يلعب عليك ويسختف فيك وياخذ دراهمنا وفي النهاية يمشي لديرته .ثم رح
دوره هناك ..
لكن فيه ناس يحترمونك ويقدرونك ، وبعضهم ياخذ رقم جوالي خاصه رواد منطقة العاذريه والثمامه
ويتصلون علي
اذا احتاجوا مساعده واجيهم على طول وبصراحه تعاملت حتى مع امراء وكانوا اشد الناس كرم
واحترام في نفس الوقت
5
طيب تقدر تمشي بالسياره في الطرقات بشكل عادي او تجد مضايقات ؟
والله يعني لكن ما اعتبرها ماضايقات بينما هي بقصد الحرص على الامن وهذا شي طبيعي
عندك التفاتيش مثلا دايم يوقفوني وينخلون السياره ويستغربون منها ولكن هذا عادي وتعودت
لان الامن اهم شي ، ولهم الحق والله يكون بعونهم بالعكس بعضهم تعود علي وصاروا يعرفوني
وبعضهم يشكرني ويمدح فيني على هالعمل الطيب ..
6
ماهي اماكن تواجدك الدائمه ؟
والله اغلب الاحيان اكون في العاذريه ، وعندك المخيمات الدعويه عند استاد الملك فهد
وفي الثمامه وروضة خريم والخفس
يتصلون علي الشباب الله يجزاهم خير وانا اجيهم بعدتي هناك انفعهم . وانفع الزوار واستنفع
انا بعد .
7
كلمة اخيره تحب توجهها لسادة الاعضاء في مجموعة ومجالس ابونواف العربيه ؟
احب اشكركم في البدايه على هذه الفرصه الطيبه واتمني لكم التوفيق ان شاء الله ، واحب
اقول للجميع انه
يجب دعم الشباب السعودي للعمل مهما كانت المهنه التي يمتهنها اي شاب سعودي افضل بكثير
من كون ان
اللي شتغلها اجنبي ، وانا لو اخذ فلوس اخذها بمقابل عمل ازين لك او لغيرك ومنهااتزود
بالبضائع وقطع الغيار اللازمه
وجزاكم الله الف خير
========================================
صور على هامش اللقاء السريع
اجل حطب للايجار
لاحظوا معي مكتوب ماء عادي ،،، ماء ملفتر والمصيبه انه كلهم يصبون من نفس التانكي
هذه المقابله اهداء من اعضاء ومشرفي مجلس سواليف نص كم الى زملائنا ومشرف مجلس السيارات
طاير بالعجه واللي معه
وبصراحه هذا اقل شي نقدر نقدمه لكم عرفان منا على جهودكم العظيمه والملموسه في طرح
كل ماهو مفيد في عالم السيارات
وتواصلكم الدائم في طرح الجديد قبل نزوله في الاسواق .. فأليكم هذه المقابله البسيطه
قــهـــر
وعندي غاز ومواطور هواء وماطور كهرباء
اجل حطب للايجار
تصميم وبرمجة 